LESONA 2

                                              NY FIKOMIANA TANY AN-DANITRA

Andriamanitra no namorona ny anjely. Losifera dia anjely tsara tarehy sady nahery tany an-danitra. Tamin'ny laharana, dia izy no ambony indrindra tamin'ny zava-boahary rehetra. Izy nolehiben'ny anjelin'Andriamanitra. Nefa tonga niavonavona noho ny voninahiny Losifera. Ka nitady hitovy amin'Andriamanitra sy nitsiriritra ny toeran'i Kristy. Hoy izy: "Ho tahaka an'Andriamanitra aho". Fahotana izany satria avonavona sy fanandratan-tena. Dia niditra tao am-pony koa ny fikomiana, sady nikiry tsy hiaiky ny fahadisoany izy. Nanao resabe tamin'ny anjely izy azy maro no nanaraka azy hikomy tamin'ny fitondram-panjakan'Andriamanitra. Rehefa nanota Losifera dia niova indrindra ny toetra amam-panahiny sy ny asany, ka nomena anarana hoe "Satana" izy (izany hoe mpanohitra no dikany) sy "devoly" (na hoe mpiampanga). Noroahina avy tany an-danitra Satana sy ny anjeliny taorian'ny fanoherana nataony. Tonga teto amin'ity tany ity izy, ary niezaka hahazo an'i Adama sy Eva hanohitra an'Andriamanitra koa. Mamitaka sy mampijaly ny olombelona izy mandraka ankehitriny, mba hahavery ny olona sy hampaharary ny fon'Andriamanitra Raintsika.

1- Anjely nanao ahoana Losifera?
Valiny. Anjely tsara tarehy sy nahery Satana talohan'ny nanotany. Na dia ankehitriny aza, dia mbola be voninahitra izy, fa tsy araka izay iheveran'ny ankamaroan'ny olona azy. (Jereo Ezek. 28: 12 - 19).

2- Nanao ahoana no nanotan'i Satana?
Valiny. Nanadino ny maha-zava-boahary azy izy, ka niavonavona sy anjary be fialonana. "Mba Andriamanitra ko aho", hoy izy; "ary eto amin'ny anankiray amin'ny fipetrahan'Andriamanitra no hipetrahako". (Ezek. 28: 2).

3- Niteraka inona izany fikomiana izany?
Valiny. Nanjary nizara ho antoko roa ny lanitra, dia ireo nijanona ho mahatoky tamin'Andriamanitra sy ireo nanaraka ny hevitr'i Satana. Ta handrombaka ny fitondram-panjakana Satana, ka dia nisy ady tany an-danitra; nefa tsy naharesy izy ny anjeliny ka noroahina hiala tany. (Apok. 12: 7 - 9).

4- Inona moa no asan'i Satana, ary aiza izy izao?
Valiny. "Mamitaka izao tontolo izao" izy. (Apok. 12: 9). "Mahonona tena, miambena; fa ny devoly fahavalonareo mandehandeha tahaka ny liona mierona mitady zay harapany" (1Pet. 5: 8). Izy ireo koa no antsoina hoe " fanahy ratsy eny amin'ny rivotra" (Efes. 6: 12).

5- Nahoana raha vao nikomy Satana no tsy nolevonin'Andriamanitra?
Valiny. Andriamanitra irery ihany no nahalala izay ho vokatry ny fahotan'i Satana. Ireo anjely nahatoky dia tsy nahalala izay fahoriana hateraky ny fahotana; koa nety ho nisalasala ny amin'ny fahamarinan'Andriamanitra izy, raha tonga dia nolevonina Satana. Tsy maintsy navela hivelatra sy hihanjahanja eo anatrehan'izao rehetra izao ny tena toetrany, ary rehefa holevonina izy amin'ny farany, dia tsy hisy tsy hiaiky amin'izay fa marina sy rariny ny fanadevonana azy.

6- Ka dia misy fanjakana ara-panahy firy ary ankehitriny eto an-tany?
Valiny. Roa. Ny "fanjakan'ny maizina" dia ny an'i Satana izany ary ny "fanjakan'ny Zanak'Andriamanitra" (Kol. 1: 12, 13). Ny olona tsirairay avy dia tsy maintsy hifidy: izay tsy mifidy ny fanjakan'i Kristy, dia efa ao anatin'ny fanjakan'i Satana rahateo.

< LESONA 1                                                                                                                   LESONA 3 >